ភ្នំពេញ៖ នាយករដ្ឋមន្រ្តីកម្ពុជា សម្តេចតេជោ ហ៊ុន សែន មានប្រសាសន៍ថាប្រទេសចិន អ៊ីតាលី ប៉ូឡូញ និងសហរដ្ឋអាមេរិក បានប្រកាសផ្តល់វ៉ាក់សាំងប្រឆាំងកូវីដ-១៩ ដែលសរុបទៅមានប្រមាណ ៣០លានដូស ដែលនឹងផ្ដល់មកដល់កម្ពុជាជាបន្តបន្ទាប់ដែលនេះនឹងធានាដល់ការចាក់វ៉ាក់សាំងដូសជំរុញជូនដល់ប្រជាពលរដ្ឋ។

ថ្លែងនៅក្នុងពិធី សម្ពោធដាក់ឱ្យប្រើប្រាស់ជាផ្លូវការនូវស្ពានអាកាសនិងផ្លូវក្រោមដីចោមចៅ នៅព្រឹកថ្ងៃទី៣១ ខែមីនា ឆ្នាំ២០២២នេះ សម្តេចតេជោ ហ៊ុន សែន មានប្រសាសន៍ថា៖ «ប្រធានាធីបតីចិនលោក ស៊ី ជីងពីង បានប្រកាសផ្តល់ជូន វ៉ាក់សាំងចំនួន ២០លានដូស។ […] ថ្ងៃទី៦ នេះបើគ្មានការប្រែប្រួលទេ វ៉ាក់សាំង នឹងមកពីអ៊ីតាលីជាង ១លានដូសទៀត បូកបន្ថែមទៅដោយវ៉ាក់សាំង ដែលប៉ូឡូញកំពុងរៀបចំ ១លានដូស។ ហើយក៏មានការសន្យាពីសហរដ្ឋអាមេរិកឱ្យយើងចំនួន៧លាន ៥សែនដូស នៅក្នុងឆ្នាំនេះដែលអាចនឹងមកដល់ក្នុងខែមេសា ខែឧសភា ខែកក្កដា ខែមិថុនា»។

សម្ដេចតេជោឱ្យដឹងថា បច្ចុប្បន្នកម្ពុជាមានវ៉ាក់សាំងនៅក្នុងឃ្លាំងជិត១២លានដូសហើយដែលគ្រប់គ្រាន់ដើម្បីចាក់ជូនដល់ប្រជាពលរដ្ឋនូវដូសជំរុញជាដូសទី៣ និងដូសទី៤៕